بلخ کې ۵۲ تنه ځوانان له درې میاشتنیو زدکړو وروسته فارغ شول
د بلخ ولایت اطلاعاتو او کلتور ریاست اړوند د ځوانانو چارو آمریت تر چتر لاندې د آنلاین کاروبار(فریلانسنګ) زده کړو برخه کې ۵۲ تنو ځوانانو ته زده کړه ورکړل شوه او تر زده کړې وروسته فارغ او د خدمت په موخه ټولنې ته وړاندې شول.
د يادو ځوانانو د فراغت په مراسمو کي د اطلاعاتو او کلتور وزارت د ځوانانو چارو معين قاري محمد يونس راشد، د بلخ ولایت د اطلاعاتو او کلتور رئیس مولوي ذبیح الله نوراني، د بلخ ولایت د ځوانانو چارو آمر سلطان محمد توخي، ځوانانو او استادانو برخه اخیستې وه.
د اطلاعاتو او کلتور وزارت د ځوانانو چارو معين قاري محمد يونس راشد فراغت غونډې ته د وينا پرمهال وویل: ځوانان د يوې ټولنې د بدلون اساسي فکتور دی او ټینګار يې وکړ، چي پکار ده افغان ځوانان د خپل ژوند ټول کړه وړه د رسول الله (ص) د سلوک سره برابر کړي او په هر اقدام کي لومړی د الله تعالي رضا وګڼي، ترڅو دين او دنيا يې جوړه شي.
ښاغلي راشد زیاته کړه؛ د اطلاعاتو او کلتور وزارت د افغان ځوانانو ټولو غوښتنو ته رسېدهګي کوي، همداراز نوموړي اسلامي ارزښتونو ته په اشارې وويل: ږيره پرېښودل او لنګۍ تړل د زده کړو مخنيوی نه کوي او بايد په هر ډګر کي خپل اسلامي ارزښتونو ته ځانګړی پام وکړو، لکه څرنګه چي د اسلام ستر پيغمبر حضرت محمد (ص) خپلو امتيانو ته سپارښتنه کړې ده.
د بلخ ولايت د اطلاعاتو او کلتور رئيس الحاج مولوي ذبيح الله نوراني لومړی ښاغلي راشد صاحب ته ښه راغلاست ووایه او زياته یې کړه؛ چې ۵۲ ځوانانو د دريو مياشتو په موده کې د فريلانسينګ يا آنلاین کاروبار په برخه کي ځانګړې زده کړه ترلاسه کړه او په دغه موده کې دوی توانېدلي چې شاوخوا پنځه زره ډالر وګټي.
د ښاغلي نوراني په وينا؛ اوسمهال په بلخ ولايت کې شاوخوا زر تنه ځوانان د انګليسي، کمپيوټر، فريلانسينګ او کسبونو په برخه کي د دغه رياست ښوونيزو مرکزونو کي په زده کړو بوخت دي.
۱۴۴۶/۴/۷ هـ ق
۱۴۰۳/۷/۱۹ هـ ل
