د لوګر ازرې ولسوالۍ کې د یو شمېر تاریخي سیمو او مشهورو زیارتونو سروې وشوه
د لوګر ولايت د اطلاعاتو او کلتور ریاست له لوري د ازرې ولسوالۍ بېلابېلو سیمو کې د یو شمېر تاریخي سیمو او مشهورو زیارتونو سروې ترسره شوه.
د اطلاعاتو او کلتور ریاست اړوند د فرهنګ او ګرځندوی آمر محمد ګل تسل او د لرغون پوهنې مدیر عبدالشکور محمدي ازرې ولسوالۍ ته د سفر پر مهال د یو شمېر تاریخي سیمو او مشهورو زیارتونو سروې ترسره کړه.
دغه راز یادو مسؤلینو د ازرې ولسوال مولوي انارګل حکمت الله سره د لیدنې پر مهال د لرغونو سیمو او تاریخي آثارو د ساتنې برخه کې د یادې ولسوالۍ د مسؤلینو د پاملرنې غوښتنه وکړه.
ياد پلاوي د ازرې ولسوالۍ د امنیتي مسؤلینو په ملتیا د یو شمېر تاریخي سیمو، مشهور زیارتونو ترڅنګ د هغو جوماتونو سروې هم وکړه، چې د تېر اشغال پر مهال ویجاړ شوي وو.
د یادونې وړ ده، چې له دې وړاندې د اطلاعاتو او کلتور ریاست له لوري د یو شمېر تاریخي سیمو، تاریخي کلاګانو، مشهورو زیارتونو ترڅنګ د سیمه ایز موزیم شاوخوا ٥٠ قلمه تاریخي آثار په ملي موزیم کې ثبت شوي دي.
۱۴۴۶/۳/۱۵ هـ ق
۱۴۰۳/۶/۲۸ هـ ل
