د کابل سیند د پاکوالي او ښکلا په اړه ناسته وشوه
چهارشنبه ( ۲۶ د ذوالحجې ۱۴۴۵ ) د اطلاعاتو او کلتور وزارت د هنر او فرھنګ معین مولوي عتیق الله عزیزي په مشرۍ د کابل ښار د تاریخي آبداتو، عامه ساحو او چاپېریال ساتنې او څارنې کمېټې د هنر او فرهنګ په معینیت کې یولسمه ناسته ترسره کړه.
په ياده ناسته کې د کابل سیند د پاکوالي او ښکلا پر لارو چارو خبرې وشوې او تصمیم ونیول شو، ترڅو له اړوندو ادارو سره له نیږدې خبرې وشي.
د هنر او فرهنګ معین مولوي عتیق الله عزیزي وويل: کابل سیند د هیواد مهمه تاریخي آبده ده او د کابل ښار د قدامت او لرغونتوب د یوه تاریخي سند په توګه پس منظر لري، چې شاوخوا ورباندې د لرغوني کابل ښار ودانۍ ابادې شوي، حفاظت او ساتنه یې د هر هېوادوال ملي دنده ده.
عزیزي له هغو پانګوالو څخه چې وخت ناوخت د کابل په سیند او حریم باندې د تاسېساتو او پانګونې هڅې کوي وغوښتل، چې د کابل سیند تاریخې حرمت او لرغونتیا ته په کتو بل ځای پانګونه وکړي او کابل سیند دې د خپل هویت او تاریخ سره ارام پریږدي.
په یاده ناسته کې په ګڼو هغو موضوعاتو هم بحث وشو او لازم تصمیمونه ونیول شو، چې د کابل ښار د یو لړ ترمېماتي او رغنیزو چارو پورې يې اړه درلوده.
۱۴۰۳/۴/۱۳ ھ ش
۲۰۲۴/۷/۳ ميلادي
