د پروان پوهنتون یو شمېر زده کړیالانو د عامه کتابتون او موزيم څخه لیدنه وکړه
چهارشنبه( ۳ د رمضان المبارک ۱۴۴۵) پروان ولايت کې د پروان پوهنتون زده کړیالانو د اطلاعاتو او کلتور رياست له عامه کتابتون او موزيم څخه ليدنه وکړه، چې پر مهال يې د ياد ریاست دځوانانو چارو آمر، د عامه کتابتون مدیر او د موزيم مدیر شتون درلود.
دعامه کتابتون مدیر عبدالغفار رووفي د پروان پوهنتون زده کړیالانو ته ښه راغلاست ووایه او غوښتنه یې وکړه چې زده کوونکې باید د ورځنیو درسونو ترڅنګ مطالعې کولو ته هم وخت ورکړي، ترڅو علمي پانګه يې زیاته او راتلونکي کې بریالي وي.
ښاغلي رووفي وویل: د پروان عامه کتابتون کې د بیلابیلو برخو زرګونه کتابونه شتون لري او دا مهال د پروان ځوانان کولای شي له دې ځایه د مطالعې لپاره کتابونه واخلي.
همدارنګه د موزيم مدیر عبدالصبور صافي موزيم کې شته لرغوني آثار لیدونکو ته تشریح کړل او زیاته یې کړه چې یاد آثار د پروان ولایت اړوند سټوپې توپدرې، د بګرام ولسوالۍ کافر قلعه او نورو لرغونو سیمو څخه لاسته راغلي، چې د یادو آثارو لرغونتیا د ۱۰۰ کلونو نیولې تر ۲۰۰۰ کالو پورې رسېږي.
د پروان پوهنتون یو شمېر زده کړیالانو د اطلاعاتو او کلتور ریاست څخه مننه وکړه، چې د مطالعې د ودې لپاره یې د ښوونیزو مرکزونو زده کوونکو ته د عامه کتابتون او موزيم څخه د لیدنې زمینه مساعده کړې.
