حسينې ساپۍ د هېواد دفرهنګ په وده کې د ځوانانو رول مهم وباله
د اطلاعاتو او فرهنګ وزارت سرپرستې حسينې ساپۍ نن د بادغيس له دوو شاعرانو سره په کتنه کې د فرهنګ په وده کې دځوانانو رول مهم وباله
د باختراژانس د خبريال د خبر له مخې، په دې کتنه کې دوو بادغيسي شاعرانو د بادغيس د ژوندانه د چاپيريال د ادارې رييس محمد ميرويس مشواڼي او د سولې او خلکو په چارو کې د جمهوري رياست د سلاکار د دفتر رييس عبدالغفار بشرمل د خپلو فرهنګي فعاليتونوپه اړوند معلومات ورکړل.
هغوى د بادغيس فرهنګي برخو ته د پاملرنې، په دغه ولايت کې د فرهنګي او ادبي پروګرامونو جوړولو او په هغو فرهنګي پروګرامونوکې چې د هېواد په مرکز او ولايتونوکې جوړيږي د بادغيس شاعرانو ته د بلنې ورکولو په لاره کې خپلې غوښتنې او وړانديزونه د اطلاعاتو او فرهنګ وزارت له سرپرستې سره شريک کړل .
دغه راز هغوى د اطلاعاتو او فرهنګ وزارت له سرپرستې څخه وغوښتل چې د هغوى د شعري ټولګو د چاپولو په برخه کې د دغه وزارت له لوري همکاري وشي.
په همدې حال کې حسينې ساپۍ د بادغيس د ځوانانو د فرهنګي فعاليتونو په ستاينې سره، د هېواد د فرهنګ په وده کې د ځوانانو رول مهم وباله او د هغوى ستونزو او غوښتنو ته د رسيدګۍ په لاره کې يې د اطلاعاتو او فرهنګ وزارت د پاملرنې ډاډ ورکړ .
کابل /دکب ١٥مه / باختر
