کندز کې د پخوا په پرتله د مطالعې دود زيات شوی
د کندز ولايت د اطلاعاتو او کلتور رياست د عامه کتابتون عمومي مدير عبدالسليم سروري وايي: په ياد ولايت کې د پخوا په پرتله د مطالعې دود زيات شوی دی، د ورځې لسو نه تر پنځلسو ځوانان عامه کتابتون ته د مطالعې لپاره راځي.
نوموړي زیاته کړه؛ چې سږ کال په تېرو لسو مياشتو کې د اطلاعاتو او کلتور ریاست عامه کتابتون ته له ۱۸۰۰ اتلس سوه څخه ډېر ځوانان د مطالعې لپاره راغلي، چې دا د دې ښکارندويي کوي چې ځوانان ډېر مطالعې ته لېواله شوي دي، د هغه په وینا د اطلاعاتو او کلتور ریاست له لوري د عامه کتابتون په تالار کې د ځوانانو، شاعرانو، لیکوالانو او فرهنګیانو ترمنځ مشاعرې هم ترسره کېږي، د دغه برنامو د ترسره کولو ترڅنګ ځوانان مطالعه کوي، چې د مطالعې سره يې ليوالتيا نوره هم ډېرېږي.
د یادونې وړ ده چې په کندوز ولايت کې د اطلاعاتو او کلتور ریاست اړوند درې عامه کتابتونونه شتون لري، چې یو کتابتون د کندوز په مرکز او دوه نور کتابتونونه د خانآباد او امامصاحب په ولسواليو کې شتون لري چې دغو کتابتونونو کې شاوخوا ۱۶۰۰۰ شپاړلس زره ټوکه مختلف کتابونه موجود دي.
۱۴۴۵/۶/۲۶ هـ ق
۱۴۰۲/۱۰/۱۸ هـ ش
