په لوګر کې د ښوونکي نړېواله ورځ ونمانځل شوه
د لوګر ولایت په اطلاعاتو او کلتور ریاست کې د ښوونکي نړېواله ورځ ونماځل شوه.
په دې اړه جوړه شوې غونډه کې د اطلاعاتو او کلتور رئیس رفیع الله صمیم، د اطلاعاتو او کلتور ریاست د ښوونیز مرکز مسؤلینو او زده کوونکو ګډون کړی و.
په پیل کې د اطلاعاتو او کلتور ریاست اړوند د ښوونیز مرکز مسؤل حسیب الله حبیب ګډونوالو ته ښه راغلاست وویل او د ټولنې د پرمختګ په برخه کې یې د ښوونکو هڅې او زحمتونه وستایل.
دغه راز د غونډې په لړ د دغه ښوونیز مرکز څو تنو زده کوونکو په وار سره د ښوونکي د نړېوالې ورځې پر تړاو خپلې چمتو کړې مقالې له ګډونوالو سره شریکې کړې.
ورپسې ښاغلي صمیم ټولو ښوونکو ته د ښوونکي د ورځې مبارکې وړاندې کړه او زیاته یې کړه د اسلام مقدس دین ښوونکي ته لوړ مقام ورکړی او موږ ټول مکلف یو چې د دغه زیارکښ قشر قدر او درناوی وکړو.
د غونډې په پای کې د ښوونکي د نړېوالې ورځې په ویاړ د اطلاعاتو او کلتور ریاست اړوند د ښوونیز مرکز ښوونکي په ډاليو او ستاینلیکونو وستایل شول.
۱۴۴۴/۳/۲۹ هـ ق
۱۴۰۲/۷/۲۲ هـ ش
