۴۶ تنه د ویناوالۍ فن له زده کړو څخه فارغ شول
د ننګرهار اطلاعاتو او کلتور ریاست له ښوونیز مرکز څخه د ختیځ ادبي بهیر په همغږۍ ۴۶ تنه ځوانان د ویناوالۍ فن له یوې میاشتنۍ زده کړو څخه د یوې غونډې په ترڅ کې فارغ شول.
په دې اړه جوړه شوې غونډه د قرآن عظیم الشان په مبارکو آیاتونو پیل شوه، ورپسې د ختیځ ادبي بهیر مشر ضیاءالدین همت مل خبرې وکړې او ویې ویل: د ویاړ ځای دی، چې نن مو ۴۶ تنه ځوانان د وینا فن له یوې میاشتنۍ برنامې څخه فارغ کړل.
ښاغلي همت مل د اطلاعاتو او کلتور ریاست څخه مننه وکړه، چې بې وزله ځوانانو ته د وړیا زده کړو زمینه برابروي.
ورپسې ښاغلي حنیف په خپلو خبرو کې ځوانانو ته ډاډ ورکړ، چې د اطلاعاتو او کلتور ریاست دروازې تل ستاسو پرمخ خلاصې دي.
د غونډې په وروستۍ برخه کې فارغینو ته بري لیکونه ورکړل شول.
۱۴۴۵/۲/۱۸ هـ ق
۱۴۰۲/۶/۱۲ هـ ش
