په ننګرهار کې د هوسا ولس او مسؤل نظام تر عنوان لاندې غونډه تر سره شوه
تېره ورځ په ننګرهار ولایت کې د هوسا ولس او مسؤل نظام تر عنوان لاندې د ولسونو او دولتي مسؤلینو ترمنځ غونډه تر شوه.
یاده غونډه د ننګرهار ولایت د اطلاعاتو او کلتور ریاست او یاد وزارت له لوري د ولسونو او دولتي مسؤلینو ترمنځ د مخامخ دوه اړخيزو غوښتنو، سپارښتنو، ګډو بحثونو او ستونزو ته د حل لارو لټولو په موخه جوړه شوې وه، چې پکې د هېواد له مرکز څخه د اطلاعاتو او کلتور وزارت نشراتي معين مولوي حيات الله مهاجر فراهي، د لوړو زده کړو وزارت علمي چارو معين دوکتور لطف الله خیرخواه، د اطلاعاتو او کلتور وزارت د باختر آژانس رئيس ضياءالحق حقمل، د دولتي ورځپاڼو رئيس مولوي محمد ابراهيم نبيل، د بیهقي رئيس عبدالعليم ځانواک، اطلاعاتو ته د لاسرسي رئيس مستغفر، د ننګرهار مرستيال والي مولوي سعيد احمد بنوري او د ملکي او نظامي ادارو مسؤلینو، قومي مشرانو، ليکوالانو، ديني علماوو، ځوانانو ګډون کړی و.
د غونډې په پیل کې د یاد ولایت د اطلاعاتو او کلتور رئيس مولوي نور محمد حنيف خبرې وکړې او ویې ویل: د شکر ځای دی چې نن موږ د اسلامي نظام څښتنان يو او نن د هېواد د مشرانو په خاصې پاملرنې سره د هوسا ولس او مسؤل نظام تر عنوان لاندې د ولسونو ترمنځ د يو چت لاندې پراخه غونډه لرو، چې په آزاده فضاء او ډاډمن امنيت کې زموږ د غونډې ټول ګډونوال له مسؤلينو سره خپلې غوښتنې، هغوی ته د دوی د پاملرنې په موخه وړاندې کوي او له نظام څخه د ملاتړ بحثونه کېږي.
ورپسې د قومونو په استازولۍ حاجي جهانزېب مومند خبرې وکړې او ویې ويل: د ا.ا.ا. له دوو کلونو حاکميت پوره کېدو سره ولسونه په دې پوه شوي، چې حاکم نظام د خلکو د هوساېنې او د هېواد د بيارغونې لپاره ډېر څه کړي او لاهم هڅې کوي.
ښاغلي جهانزیب او یو شمېر نورو ولسي وګړو له مسؤلینو وغوښتل چې د معارف په ګډون د سړکونو، روغتيا او ځوانانو ته د کار او روزګار برابرولو زمينې برابرې کړي.
د خلکو د غوښتنو او وړانديزونو اورېدو وروسته د اطلاعاتو او کلتور وزارت نشراتي معين، د لوړو زده کړو وزارت علمي چارو معين او د ننګرهار ولايت مرستيال والي په خپلو خبرو کې د خلکو د خبرو هرکلی وکړ او ویې ويل: دغه نظام د همدې ولسونو په ملاتړ او د دوی د بچيانو د قربانيو او سرښندنو په نتيجه کې رامنځته شوی، موږ به د خپلو ولسونو ستونزو او مشکلاتو ته د حل لارې لټوو او ستاسې غوښتنې به د حل په موخه تر مشرانو ورسوو.
١٤٤٥/٢/٩ هـ ق
١٤٠٢/٦/٤ هـ ش
