د غزني جهادي موزیم ته ۲۱ قلمه جهادي اثار وسپارل شول
په دغو اثارو کې نظامي وسایل او تجهیزات او د «دلایل الخیرات» په نوم یو ټوک کتاب شامل دي. یاد آثار د جهاد د دورې له یوه شهید څخه پاتې شوي، چې د ځینو پر مخ یې د مرمیو د لګېدو نښې هم لیدل کېږي.
دغه جهادي آثار چې د غزني ولایت د اندړو ولسوالۍ د شهید ابو یوسف، چې یو له مشهورو جهادي قوماندانانو څخه و، د جهادي ډلې له غړو سره ساتل کېدل، چې د غزني د اطلاعاتو او فرهنګ رئیس ملا حمیدالله نثار ته وسپارل شول.
ملا حمیدالله نثار د جهادي اثارو راټولول او ساتنه؛ د مشرتابه د فرمان عملي کول او د اشغالګرو پر وړاندې د افغانستان د ملت د شل کلن جهاد د شهیدانو وینو او قربانیو ته درناوی وباله.
نوموړي د شهید ابو یوسف د جهادي ډلې له غړو څخه د دغو اثارو د ساتنې او یاد ریاست ته د سپارلو له امله مننه وکړه او له نورو مجاهدینو او د شهیدانو له کورنیو څخه یې هم وغوښتل چې خپل جهادي آثار او هغه اسناد چې په سیمو کې د اشغالګرو د جنګي جنایتونو څرګندونه کوي، جهادي موزیم ته وسپاري، ترڅو په راتلونکي کې د هېواد په تاریخ کې ثبت شي.
د یادونې وړ ده، چې دغه جهادي آثار د غزني ولایت د شهید ابو یوسف د نظامي جبهې د تخنیکي ډلې له لوري جوړ شوي وو او د اشغالګرو پر وړاندې د جهاد پر مهال ترې کار اخیستل کېده.
۱۴۴۸/۴/۲۷ هـ ق
