میدان وردګو کې د عمر راډیو په نوم یوې راډیو نشرات پیل کړل
د میدان وردګو ولایت په سیدآباد ولسوالۍ کې عمر راډیو د یو لړ مراسمو په ترڅ کې خپلې خپرونې پیل کړې.
د عمر راډیو مسؤل حکمت الله الیاس وویل: د رسنیو مسؤولیت یوازې خبر رسول نه دي، بلکې د پوهاوي لوړول، د اسلامي او ملي ارزښتونو ساتنه او د ټولنې د پرمختګ لپاره کار کول هم د رسنیو اساسي دنده ده. نوموړي زیاته کړه، چې عمر راډیو به د متوازنو او ګټورو خپرونو له لارې د ولس غږ تر مسؤلینو ورسوي او د حکومت او ولس ترمنځ به د باور او همغږۍ فضاء د پیاوړتیا لپاره هڅې وکړي.
همدا راز د اطلاعاتو او فرهنګ رئیس مولوي حبیب الله مجاهد وویل: رسنۍ د ټولنې د فکري ودې، عامه پوهاوي او سالمو ارزښتونو د ترویج مهم بنسټونه دي. نوموړي زیاته کړه، چې د عمر راډیو پرانیسته د میدان وردګ ولایت لپاره یو مهم رسنیز پرمختګ دی او کولای شي، چې د اسلامي، علمي او فرهنګي خپرونو له لارې د ولس په پوهاوي او روزنه کې اغیزمن رول ولوبوي.
ښاغلي مجاهد د اسلام له نظره د ژورنالیزم پر ارزښت خبرې وکړې او ویې ویل: چې رسنۍ د نننۍ ټولنې لپاره د ښوونیزو مرکزونو حیثیت لري.
د یادونې وړ ده، چې عمر راډیو به د میدان وردګو ولایت د سیدآباد ولسوالۍ څخه په څلوریشتو ساعتونو کې ۱۵ ساعتونو لپاره خپل نشرات ترسره کوي.
۱۴۴۷/۱۲/۲۲ هـ ق
