خبریالانو او مطبوعاتي مسؤلینو ته د ظرفیت لوړونې روزنیز پروګرام جوړ شو
د غور ولایت د اطلاعاتو او فرهنګ ریاست او د یو همکارې ادارې په ګډې همکارۍ د دغه ولایت ۲۰ تنو خبریالانو او مطبوعاتي مسؤلینو ته د ظرفیت لوړونې روزنیز پروګرام پیل کړ.
د اطلاعاتو او فرهنګ رئیس وویل: له دې امله چې رسنۍ د ولس او دولت ترمنځ د اړیکو پُل دی، نو د رسنیزو کارکوونکو د ظرفیت لوړولو لپاره لا زیاتو هڅو ته اړتیا ده.
نوموړي زیاته کړه، چې د اطلاعاتو او فرهنګ ریاست د ولایتي ادارو په همغږۍ تل هڅه کړې ترڅو د رسنیو ملاتړ وکړي، خو بیا هم اړینه ده، چې د رسنیو ملاتړ بنسټونه د رسنیو د قانون او پالیسۍ په چوکاټ کې له رسنیو څخه ملاتړ ته دوام ورکړي او د خبریالانو لپاره نور روزنیز پروګرامونه هم جوړ کړي.
په دې روزنیز پروګرام کې د رسنیو مسؤلینو، د دولتي ادارو مطبوعاتي مسؤلینو او سیمهییزو خبریالانو ګډون کړی و. ګډونوالو د دغه ډول پروګرامونو جوړول د خپلو کاري چارو د ښه والي لپاره اغېزمن وبلل او غوښتنه یې وکړه، چې په راتلونکي کې هم ورته روزنیز پروګرامونه جوړ شي.
۱۴۴۷/۱۲/۲۱ هـ ق
