تخار کې د کتابونو نندارتون جوړ شو
د تخار د اطلاعاتو او فرهنګ ریاست له لوري تلقان ښار کې د کتاب او کتابلوستنې اوونۍ په مناسبت د یو شمېر سیمهییزو مسوولینو، فرهنګیانو، استادانو، زدکړیالانو، ځوانانو او د کتاب مینهوالو په شتون کې د کتابونو نندارتون جوړ شو.
دغه نندارتون د مطالعې فرهنګ د ودې، کتابلوستنې ته د ځوانانو هڅونې، د لیکوالانو او خپرندویانو د ملاتړ او د علمزده کړې د فرهنګ د بنسټیز کولو په موخه جوړ شوی دی.
د اطلاعاتو او فرهنګ رییس کتاب د ټولنې د فکري، علمي او فرهنګي ودې له مهمو وسیلو څخه وباله او د ټولنې د بېلابېلو قشرونو ترمنځ یې د مطالعې د فرهنګ پر پراختیا ټینګار وکړ. هغه له خلکو وغوښتل چې له دې نندارتون څخه لیدنه وکړي او د دې نندارتون له معنوي او ګټورو شتمنیو څخه ګټه واخلي.
په دې نندارتون کې د ديني علومو کتابونو ترڅنګ د عصري علومو بېلابېل کتابونه لکه تاریخ، ادبیات، فرهنګ، ښوونې او روزنې، ټولنیزو علومو او د کورنیو لیکوالانو آثار نندارې ته وړاندې شوي دي، ترڅو لیدونکي له لا ډېرو علمي او فرهنګي سرچینو سره بلد شي.
ګډونوالو د اطلاعاتو او فرهنګ ریاست دغه اقدام د کتابلوستنې د فرهنګ د ودې لپاره ارزښتناک وباله او په راتلونکي کې یې د ورته فرهنګي پروګرامونو د جوړېدو غوښتنه وکړه.
۱۴۴۷/۱۱/۲۵ هـ ق
