میدان وردګو کې د رسنیو له مسؤلینو او خبریالانو سره د همغږۍ ناسته وشوه
د میدان وردګو ولایت د اطلاعاتو او کلتور ریاست له لوري د رسنیو مسؤلینو او خبریالانو سره د همغږۍ ناسته وشوه، چې پکې د اطلاعاتو او کلتور ریاست مسؤلینو ترڅنګ د امر بالمعروف او نهی عن المنکر رئیس شېخ شرف الدین نقره کارهم ګډون کړی و.
د اطلاعاتو او کلتور رئیس مولوي حبیب الله مجاهد د رسنیو له مسؤلینو څخه مننه وکړه، چې د اطلاعاتو او کلتور ریاست سره په همغږۍ رسنیزې چارې پر مخ وړي او تر دې مهاله په دغه ولایت کې د رسنیزو چارو پر وړاندې کوم خنډ هم نه دی رامنځته شوی، ښاغلي مجاهد د رسنیو ملاتړ خپل مسوولیت یاد کړ.
په ناسته کې د امر بالمعروف او نهی عن المنکر رئیس شېخ شرف الدین نقره کار خبریالان په ټولنه کې د يو مثبت بدلون لپاره غوره ځواک وبللو او ویې ويل: امربالمعروف او نهي عن المنکر د اسلامي نظام یو مهم او اساسي اصل دی، د امربالمعروف او نهي عن المنکر وزارت له خوا جوړ شوی قانون د اسلام مبارک دین د اصولو او حنفي فقهې مطابق جوړ شوی دی، نوموړي د رسنیو له مسؤلینو او خبریالانو څخه هیله وکړه، چې د یاد قانون د عامه پوهاوي په برخه کې پوره همکاري وکړي.
په دغه ناسته کې د رسنیو استازو د اطلاعاتو او کلتور ریاست له همکاریو څخه د مننې ترڅنګ د امر بالمعروف او نهي عن المنکر ریاست مسؤلینو ته ډاډ ورکړ، چې د یاد قانون په ښه پلي کولو او د عامه پوهاوي په برخه کې به له دغه رياست سره پوره همکاري وکړي او ژمنه یې وکړه، چې د پالیسیو په رڼا کې به د ولس او حکومت ترمنځ د باور فضاء ساتنه کوي.
۱۴۴۷/۵/۸ هـ ق
