بهارک ولسوالۍ کې د کتاب نندارتون او د سیب رخش په نوم مشاعره جوړه شوه
د بدخشان ولایت د اطلاعاتو او کلتور ریاست له لوري بهارک ولسوالۍ کې د محلي فرهنګ درناوي او پیاوړتیا او د ادیبانو او فرهنګیانو ترمنځ د یووالي او همدردۍ د فضا رامنځته کولو په موخه د کتاب يو ورځنی نندارتون او د سیب رخش په نوم مشاعره د یاد ریاست د مسؤلینو، لسګونه تنو شاعرانو، لیکوالانو او فرهنګپالانو په حضور کې ترسره شوه.
د اطلاعاتو او کلتور رئیس انجینر ذبیح الله امیري د شاعرانو او فرهنګيانو په شانداره ګډون د خوښۍ ښودلو تر څنګ وویل: د اطلاعاتو او کتلور وزارت هر کال د هېواد په ګوټ ګوټ کې بېلابیل فرهنګي پروګرامونه او مشاعرې د بومي کلتور د ساتنې او د ادیبانو د راټولولو په موخه ترسره کوي.
نوموړي زیاته کړه؛ د دغو پروګرامونو جوړول نه یوازې د یووالي او د شاعرانو او لیکوالانو ترمنځ د همدردۍ فضا رامنځته کولو لامل کیږي، بلکي دا زموږ د هېواد د فرهنګي هویت د ژوندي ساتلو په لور یو ګام دی.
همدارنګه د اطلاعاتو او کلتور ریاست او يوه خصوصي کتاب پلورنځي له لوري د کتاب یو ورځنی نندارتون د مطالعې دود د غښتلي کولو په موخه جوړ کړ.
په دې نندارتون کې سلګونه ټوکه بېلابیل دیني، فرهنګي، ټولنیز، ادبي او اقتصادي کتابونه چې د بدخشان ولایت د لیکوالانو آثار دي، د یوې ورځي په موخه نندارې ته ایښودل شوي وو.
۱۴۴۷/۲/۱۳ هـ ق
