د جهادي ارزښتونو لوی ریاست د جهادي آثارو راټولولو په لړ کې یو میل امریکایي غنیمت شوی ثقیل تر لاسه کړ
د اطلاعاتو او کلتور وزارت، د جهادي ارزښتونو د ساتنې لوی رياست اړوند د جهادي کارنامو او موزيم رياست د جهادي ميراثونو د راټولولو په لړ کې په کندهار ولايت کې ۱۷ کاله پخوانی غنیمت شوی امريکايي ثقیل ترلاسه کړ.
د کندهار ولايت د ميوند ولسوالۍ د شلغمۍ مانده سیمه کې د افغانستان اسلامي امارت د يو تن زړور او سرسپارلي مجاهد د زرقاویانو د قطار سر لاری محمد نسیم زرقاوي له لوري په ۲۰۰۸ کال کې امريکايي اشغالګرو ته د پوستو او قرارګاه جوړولو پرمهال د ځای پر ځای شوي ماين د چاودنې له امله ځاني او مالي زيان واوښت، چې د ځاني تلفاتو تر څنګ يې يو ميل امریکایي ثقیل او څو نور شاجوره هم همدې سيمه کې تر خاورو لاندې شوی و، چې اوولس کاله بعد د کندهار د قول اردو د انجينرۍ ټيم ته په یاده ساحه کې د تاسيساتو جوړولو پرمهال په لاس ورغلې دي او د جهادي ارزښتونو د ساتنې عمومي رياست اړوند د جهاد د کارنامو او موزيم ریاست ته د امريکايي اشغالګرو سره د جهادي دورې د يو مهم غنيمت په توګه چې د پيښې له ورځې اوولس کاله بعد تر لاسه شوی، و سپارل شو، دا ثقیل د اشغال ضد جهاد يوه نادره نښه ده، چې د اسلامي امارت د مبارزو اتلانو زړورتيا او استقامت څرګندوي، چې د تاريخي یادګار په توګه به په جهادي موزیم کي وساتل شي.
د یادونې وړ ده، چې د افغانستان اسلامي امارت زړور مجاهدين د سپيڅلي جهاد پر مهال دا ډول د سرښندنې او زړورتیا زرګونه کارنامې لري، چې د جهادي ارزښتونو د ساتنې رياست يې په راټولولو بوخت دی او د ساتنې په موخه يې جهادي موزيم هم جوړ شوی دی.
۱۴۴۶/۱۲/۱۹ هـ ق
