په دایکنډي کې د انګلیسي ژبې او کمپیوټري مهارتونو وړیا ټولګي پیل شول
د دایکنډي ولایت د اطلاعاتو او کلتور ریاست د ځوانانو چارو آمریت د خپلو ښوونيزو پروګرامونو په دوام دا ځل ۲۱۰ تنو ځوانانو ته د انګلیسي ژبې او د کمپیوټر مهارتونو وړیا کورسونه پیل کړي دي.
د دایکنډي د اطلاعاتو او کلتور رئیس قاري آغا ولي قریشي د انګلیسي ژبې زده کړه او د کمپیوټر مهارتونه د ځوانانو لپاره خورا اړین وبلل او زیاته یې کړه؛ د افغانستان اسلامي امارت موخه دا ده، چې د ځوان نسل لپاره د تعلیم او زده کړې مناسب فرصتونه برابر کړي، د دغو وړیا کورسونو موخه د ځوانانو د ظرفیت لوړول دي، نوموړي له ځوانانو وغوښتل، چې له شته فرصتونو ګټه واخلي.
د یادونې وړ ده، چې په نږدې راتلونکي کې به د پښتو ژبې او ویناوالۍ وړیا ټولګي هم پیل شي.
۱۴۴۶/۱۰/۱۷ ق
