په تخار ولایت کې له خصوصي راډیوګانو څخه د چارو د ښه والي په موخه لیدنه وشوه

د تخار ولایت د اطلاعاتو او کلتور ریاست مسؤلینو د ریحان، هم‌صدا او ردا په نومونو خصوصي راډیوګانو څخه د چارو د لا ښه والي په موخه لیدنه وکړه.
د اطلاعاتو او کلتور ریاست د اطلاعاتو امر خلیل الله امیني د راډیوګانو د لیدنې په جریان کې د دغو رسنیو له مسؤلینو سره د فعالیت جواز ترلاسه کولو، د ګټورو اسلامي پروګرامونو تنظیم او د اسلامي امارت نظام لاسته راوړنو د خپرولو په اړه بحث او نظرونه تبادله کړل.
د رسنیو مسؤلینو ژمنه وکړه، چې خپرونې به د اسلامي امارت د قوانینو او مقرراتو مطابق ترسره کوي او د اسلامي نظام لاسته راوړنې به منعکس کوي.
د ردا راډیو د روغتیايي او ټولنیزو پروګرامونو ویاند صدرالدین قونوي وویل: په تېرو درېیو کلونو کې د ردا راډیو خپرونې د اسلامي امارت د اصولو او پالیسۍ مطابق وې، او د دې رسنۍ مسؤلین به هڅه وکړي، چې خلکو ته نور هم ګټور او روزنیز پروګرامونه چمتو او خپاره کړي.
د يادونې وړ ده، چې دا مهال په تالقان ښار کې اووه دولتي او خصوصي محلي راډیوګانې فعالیت کوي.

۱۴۴۶/۶/۲۹ هـ ق
۱۴۰۳/۱۰/۱۱ هـ ل