د وياندويانو د کاري استقامت په اړه د عالیقدر امير المومنين حفظه الله د فرمان په اړه له مرکزي وياندويانو سره د همغږۍ غونډه ترسره شوه
د اطلاعاتو او فرهنګ وزارت د نشراتو معينيت اړوند اطلاعاتو ته د لاسرسي رياست له لوري د وياندويانو د کاري چوکاټ په اړه له دوی سره د عالیقدر اميرالمومنين حفظه الله د فرمان تشريحي غونډه ترسره شوه.
ياده غونډه کې د چارو ادارې لوی رئيس شيخ الحديث نورالحق انور، د اطلاعاتو او فرهنګ وزارت د ګرځندوی، مالي او اداري چارو معين مولوي قدرت الله جمال، د هنر او فرهنګ معين مولوي عتيق الله عزيزي، د نشراتو معينيت وارسي کوونکي مولوي ضیاء الحق حقمل، اطلاعاتو ته د لاسرسي رياست رئيس مولوي رحمت الله نړيوال، د دولتي ادارو د مطبوعاتو او نشراتو رئيسانو او وياندويانو برخه اخستې وه.
غونډه د قرانکريم د مبارکو آياتونو په تلاوت سره پيل شوه، ورپسې د چارو ادارې لوی رئيس شيخ الحديث نورالحق انور صاحب د اميرالمومنين حفظه الله فرمان په جامع ډول سره توضيح او تشريح کړو، د عالیقدر اميرالمومنين حفظه الله په فرمان کې يادونه شوې ده، چې د امارتي ادارو وياندویان مکلفيت لري، چې د ا.ا.ا. موخې، پاليسۍ، فعاليتونه، لاسته راوړنې او نور اطلاعات د خپل کاري چوکاټ او پالیسي په نظر کې نیولو سره رسنيز او خپاره کړي.
ورپسې د مرکزي وياندويانو له لوري د فرمان اړوند پوښتنې وشوې، چې د ښاغلي انور صاحب له لوري په تفصيل سره ځوابونه ورکړل شول.
همدارنګه د اطلاعاتو او فرهنګ وزارت د هنر او فرهنګ معين مولوي عتيق الله عزيزي غونډې ته په خپله وينا کې وويل: د اسلامي امارت ټولې تګلارې او پاليسۍ په داسې ډول ترتيب شوې دي، چې عملي کول يې د دواړو جهانونو د سعادت سبب ګرځي، د ا.ا.ا. هميشه اعتدال په پام کې نيولی دی، د کفري نړۍ له لوري د ډيرو سختيو سره بيا هم ا.ا. د معتدله پاليسۍ له امله بريالی شوی دی.
په پای کې د اطلاعاتو او فرهنګ وزارت د ګرځندوی، مالي او ادارې چاور د معين مولوي قدرت الله جمال ویاندویانو ته توصیه وکړه چې په تاسو لوی باور او اعتماد شوی، نو تاسو هم په کامل اخلاص سره خپلو چارو ته متوجه شی.
۱۴۴۶/۲/۲۲ هـ ق
۱۴۰۳/۶/۵ هـ ل
