هلمند عامه کتابتون ته سلګونه ټوکه کتابونه وسپارل شول
د هلمند د اطلاعاتو او کلتور ریاست د ۱۴۰۳ هـ ش کال د ثور میاشتې وروستۍ اونۍ کې د قران کریم او کتاب درې ورځنی نندارتون جوړ کړی وو، چې په جریان کې یې د هلمند ولایت یو تن ملي سوداګر الحاج محمد عیسٰی عمري له لوري د اطلاعاتو او کلتور ریاست اړوند عامه کتابتون سره د ١٠٠٠ ټوکه بېلابېلو کتابونو ژمنه شوې وه، چې د ژمنې سره سم یې یاد کتابونه عامه کتابتون ته وسپارل.
د عامه کتابتون مدیر محسن عمري د ښاغلي محمدعیسی عمري څخه مننه وکړه، چې عامه کتابتون ته یې ١٠٠٠ ټوکه کتابونه وسپارل.
نوموړي وویل: په دې کتابونو سره عامه کتابتون لا غني شو، د نويو کتابونو په راتلو سره به د عامه کتابتون د لوستونکو ډيرې ستونزې حل شي.
د یادونې وړ ده، چې مخکې هم د یو ملي سوداګر له لوري ٥٠٠ ټوکه بېلابېل کتابونه عامه کتابتون ته سپارل شوي وو.
۱۴۴۶/۲/۱۷ ھ ق
۱۴۰۳/۵/۳۱ ھ ل
