د واټونو او څلورلارو د نومونې کمېسیون دویمه ناسته ترسره کړه

سه شنبه( ۲۵ د ذوالحجې ۱۴۴۵) د اطلاعاتو او کلتور وزارت د هنر او فرهنګ د معین مولوي عتیق الله عزیزي په مشرۍ د هېواد د مقدسو ځایونو، واټونو او څلورلارو د نومونې کمېسیون دویمه ناسته ترسره کړه.
د هنر او کلتور معین د کمېسون غړو ته د ښه راغلاست ويلو تر څنګ د کمیسیون غړي متوجه کړل، چې ورسپارل شوي امور په اخلاص ترسره او د وطن علیا مصالح په پام کې ونیسي.
همداراز ناسته کې پرېکړه وشوه، چې د کابل ښار هغه واټونه چې نومونه یې بدلون مومي او یا تازه نومونه ورته غوره کیږي، د لیکدړو ( لوحو ) ډیزاین او ترتیب به د کابل ښاروالۍ جوړوي او د کمېسیون د غړو له خوا به نصبیږي.
همدارنګه پرېکړه وشوه چې د کابل ښار د ده افغانانو (زیرزمیني) سیمه د فرهنګ څلورلارې او د ښوونې او روزنې پوهنتون څلور لارې به د کتاب په نومونو ونومول شي همدارنګه د کابل شیرپور سیمه کې به د انقرې جادې لپاره نوی لوحه ترتیب شي.
دغه راز دیوشمیر نورو هغو لارو او واټونو په باب هم بحث وشو، چې نومونه یی په سلیقوي او قومي نسبتونو غوره شوي وو، چې بېرته به خپلو پخوانیو او لرغونو نومونو ته اړول کیږی.

۱۴۰۳/۴/۱۲ ھ ل
۲۰۲۴/۷/۲ ميلادي