سپين بولدک کې د ( ښکلا ) تر عنوان لاندې مشاعره تر سره شوه
جمعه ( ۲۲ د ذوالقعدې ۱۴۴۵ ) د کندهار ولايت په سپين بولدک ولسوالۍ کې د سيند ادبي بهير له لوري د اطلاعاتو او فرهنګ رياست په همغږۍ د ( ښکلا ) تر عنوان لاندي شانداره مشاعره تر سره شوه.
مشاعره کې د اطلاعاتو او فرهنګ رياست د هنر او فرهنګ آمر عبدالشکور څپاند، د ځوانانو چارو آمر حافظ حمد الله سعيد، يو شمير نورو مسؤلينو، د کندهار، هلمند او بيلا بيلو ولايتونو شاعرانو، ليکوالانو، اديبانو او سلګونه ولسي خلکو ګډون کړی وو.
د اطلاعاتو او فرهنګ رياست د هنر او فرهنګ آمر ښاغلي څپاند په خپلو خبرو کې د شاعرانو او ليکوالانو پر مسؤليت هر اړخيزې خبري وکړې او ويې ويل: شاعران او ليکوالان باید د يووالي او په ځانګړي ډول د ځوانانو د فکري روزنې لپاره ډير کار وکړي.
د مشاعرې په ترڅ کې شاعرانو او ليکوالانو د ولس پر يووالي، د افغانانو پر ميړانې، ورورګلوۍ او د اسلامي امارت په ملاټر شعرونه، ترنمونه او ديکلومې په خپلو ښکلو اوازونو کي تر سره کړې.
۱۴۰۳/۳/۱۱ هـ ل
۲۰۲۴/۵/۳۱ میلادي
