د اطلاعاتو او کلتور ریاست کلتوري پلاوي د سید آباد ولسوالۍ له تاریخي او سیاحتي سیمو څخه لیدنه وکړه

د میدان وردګو ولایت د اطلاعاتو او کلتور رئیس مولوي حبیب الله مجاهد په سپارښتنه کلتوري پلاوي د دغه ولایت  سیدآباد ولسوالۍ ته د تاریخي آبدو او لرغونو سیمو د نظارت په موخه سفر وکړ.
دغه پلاوي چې مشري یې د کلتور او ګرځندوی آمر ښاغلي شفیق الله فضلي کوله، د اړونده ولسوالۍ له شیرازي بابا زیارت، لرغونې تورې کلا او سوبۍ له زیارت څخه لیدنه وکړه.
توره کلا د سیدآباد ولسوالۍ تنګي درې د دوآب کلي سره د جګ غره پر سر له اسلام څخه مخکې د یو پهلوان له خوا ودانه شوې، د سیمې یو تن اوسېدونکي معلم شفیق په وینا دا کلا د لوګر ولایت د سجاوند کلا ته ورته ده او ویل کیږي چې دا د بودایزم مذهب د پیروانو دفاعي سنګر و.
 بل خوا داسې روایت هم شته چې ترې لاندې په دوه پوړونو کې ودانۍ هم شتون لري خو اوس د دغه کلا یوازې یو دېوال پاتې دی. 
د اطلاعاتو او کلتور رئیس مولوي حبیب الله مجاهد وایي: تاریخي آبدې او لرغونې سیمې د افغانستان د تېر تاریخ او برم ښکارندوی دي، تر څو په ښه بڼه ترې ساتنه او پالنه وشي. ښاغلی مجاهد زیاتوي: د افغانستان اسلامي امارت د اطلاعاتو او کلتور وزارت د یادو لرغونو سیمو او تاریخي آبدو د ساتنې او بیا رغونې لپاره ځانګړی پلان لري، چې په راتلونکي کې به پلي شي، ترڅنګ یې د میدان وردګ ولایت له عامو خلکو غواړي، چې د دغه سیمو په ساتنه کې له اطلاعاتو او کلتور ریاست سره همکاري وکړي.

۱۴۴۵/۴/۲۷ هـ ق
۱۴۰۲/۸/۲۰ هـ ش