د اطلاعاتو او کلتور رئيس د جوزجان له ایمشک تاريخي تپې څخه ليدنه وکړه

تېره ورځ (۳/۳/۱۴۴۵ هـ ق) د جوزجان ولایت د اطلاعاتو او کلتور رئيس مولوي سيف الدين معتصم د ایمشک له تاريخي تپې څخه ليدنه وکړه.
د یادې لیدنې پرمهال ښاغلي معتصم وويل: د رارسېدلو راپورونو په اساس يو تعداد خلکو د ايمشک تاريخي تپې په ساحه کې کښتونه کرلي و، په داسې حال کې چې د تاريخي ساحو څخه هر ډول استفاده منع ده، حتی د تاريخي ساحو په حريم کې هر ډول فعاليت د قانون خلاف کار دی.
نوموړي زياته کړه، د همدې مقصد لپاره مو د يادې تاريخي تپې څخه ليدنه وکړه، او دلته کښت کوونکو ته مو توصيه وکړه، چې له دې بعد به دلته هېڅ ډول فعاليت نه کوي.
د ښاغلي معتصم په خبره، له تاريخي ساحو او حريم څخه يې استفاده کول، ددې ځايونو تاريخي اصالت تر سوال لاندې راولي، همدا ډول د تاريخي ساحو ساتنه يواځې د اطلاعاتو او کلتور رياستونو دنده نه ده؛ بلکې ټول ملت يې په ساتنه مکلف دی.
د یادونې وړ ده، چې ایمشک تپه يوه تاريخي ساحه ده چې زرګونه کاله تاريخي قدامت لري، چې د کوشانيانو او باختريانو په دورو پورې اړه لري.