لغمان کې د خبريالانو لس ورځنی روزنيز ورکشاپ پای ته ورسيد

لغمان ولايت کې د کهکشان رسنيز ګروپ او اطلاعاتو او کلتور رياست په همغږۍ لس ورځې مخکې پیل شوی روزنيز ورکشاپ چې د لغمان او نورستان ولايتونو ۲۰ تنو خبريالانو ته د روزنې په موخه جوړ شوی و، پای ته ورسېد.
په دې روزنيز ورکشاپ کې خبريالانو ته د خبریالۍ په اصولو، مهارتونو، اخلاقو، حقوقو، تحقیقي، تحلیلي او فیچري راپورونو د چمتو کولو زده کړې په مسلکي توګه ورکړل شوې.
د لغمان د اطلاعاتو او کلتور رئيس مولوي عبدالنور رسولي د کهکشان رسنيز ګروپ او روزونکو څخه د ياد روزنيز ورکشاپ د جوړولو له امله مننه وکړه او له خبريالانو يې وغوښتل، چې دلته زده کړې پوهه تر نورو هم ورسوي.
ور پسې په اقتصادي او کلتوري چارو کې د ولایت سلاکار رفیع الله رفیع له خبريالانو وغوښتل، څه مو چې دلته زده کړي په مسلکي بڼه یې د خپلو رسنیو له لارې ولس ته وړاندې کړئ، نوموړي د ولایتي ادارې په استازیتوب ټولو خبریالانو ته ډاډ ورکړ چې په تحقیقي راپور جوړونه کې له ژورنالیستانو څخه بشپړ ملاتړ کوي.
د خبريالانو په استازولۍ بشير احمد احمدي د اطلاعاتو او کلتور رياست، کهکشان رسنيز مرکز او روزونکو څخه د مننې ترڅنګ ياد روزنيز ورکشاپ د مسلکي خبريالۍ په برخه کې ډېر ګټور وباله.

۱۴۴۴/۱۱/۱۰ هـ ق
۱۴۰۲/۳/۹ هـ ش