کاپیسا کې د ژورنالیستانو د ظرفیت لوړونې دوه ورځنی ورکشاپ پای ته ورسېد

د کاپیسا کې د ژورنالیستانو د مسلکي ظرفیت لوړونې په موخه د رسنیزو اخلاقو او د ژورنالیزم اړوندو برخو کې دوه ورځنی روزنیز ورکشاپ پای ته ورسېد.
د کاپیسا د اطلاعاتو او فرهنګ رئیس مولوي کریم‌الله وثیق د یاد ورکشاپ د پای په مراسمو کې د ژورنالیزم له مسلک سره اړوند فعالیتونه د خلکو او ټولنې پر وړاندې ستر مسؤولیت وباله او له ژورنالیستانو څخه یې وغوښتل، چې د خلکو او ټولنې د پوهاوي په برخه کې په بشپړه ژمنتیا او امانت‌دارۍ سره هڅې وکړي.
د ورکشاپ ګډونوالو د دغه روزنیز پروګرام هرکلی وکړ او غوښتنه یې وکړه، چې په راتلونکي کې هم د ورته روزنیزو پروګرامونو لړۍ دوام ومومي، ترڅو د دوی فعالیتونه د ژورنالیزم د مسلک له اصولو سره سم لا پیاوړي او منظم شي.
د یادونې وړ ده، چې دغه دوه ورځنی ورکشاپ د افغانستان د آزادو ژورنالیستانو د اتحادیې له لوري، د کاپیسا ولایت د اطلاعاتو او فرهنګ ریاست په همغږۍ جوړ شوی و، چې په کې د یو شمېر امارتي ادارو د مطبوعاتي مسؤولینو، د امارتي او خصوصي رسنیو د ژورنالیستانو په ګډون ۱۶ کسانو پکې ګډون کړی و.

۱۴۴۸/۴/۱۶ هـ.ق