د اوولسمې ګڼې فرمان د ښه تطبیق لپاره له دیني علماوو سره غونډه ترسره شوه

د بغلان د اطلاعاتو او کلتور ریاست له یو شمېر دیني علماوو سره غونډه ترسره کړه، چې په ترڅ کې یې د امیرالمؤمنین حفظه‌الله تعالی د ۱۷مې ګڼې فرمان پر تطبیق او تشریح ټینګار وشو.
د اطلاعاتو او کلتور رئیس وویل: چې ځینې ناسم دودونه او رواجونه، په ځانګړي ډول د واده، فاتحې، ماتم، حج او نورو مناسبتونو په مراسمو کې، پر خلکو درانه لګښتونه تپي او کله ناکله د کورنیو ستونزو لامل هم کېږي.
ښاغلي هاشمي ټینګار وکړ، چې دیني علماء مسوولیت لري، څو د خلکو د باورونو د اصلاح، د ناسمـو دودونو او رواجونو د مخنیوي او په بېلابېلو مراسمو کې د اضافي لګښتونو د کمولو په موخه خلکو ته عامه پوهاوی ورکړي.
په همدې حال کې، مولوي سیدالرحمن سنګري د ګډونوالو عالمانو په استازیتوب ژمنه وکړه، چې دیني عالمان به د ۱۷مې ګڼې فرمان د تطبیق، د خلکو د پوهاوي او په ټولنه کې د ناسمو دودونو او رواجونو د کمولو په برخه کې همکاري وکړي.
۱۴۴۸/۴/۳ هـ ق