ځوانانو ته د آنلاین او سوداګرۍ زده کړو مرکز پرانېستل شو
د بغلان اطلاعاتو او کلتور ریاست، د اکتید مؤسسې په مالي همکارۍ، د دې ولایت ۱۷۴ تنو ځوانانو لپاره د آنلاین او سوداګرۍ زدهدکړو زمینه برابره کړه.
د بغلان د اطلاعاتو او کلتور رییس د دې پروګرام د پرانېستې په مراسمو کې د علم او پوهې پر اهمیت او په ټولنه کې د ځوانانو پر رول خبرې وکړې.
نوموړي د دې روزنیز پروګرام د زمینې برابرولو له امله له اکتید مؤسسې څخه مننه وکړه. هغه د دغه مرکز جوړول د ځوانانو د مهارتونو د لوړولو او اقتصادي ځان بسیاینې په برخه کې مهم وبلل او له ګډونوالو یې وغوښتل چې خپلې زده کړې په جدي توګه تعقیب کړي.
بلخوا، د شمالختیځ زون لپاره د اکتید دفتر همغږي کوونکي د ځوانانو د جذب په بهیر کې د روڼتیا او د درسي ټولګیو د معیاري کولو په اړه ډاډ ورکړ او هیله یې څرګنده کړه، چې ځوانان به له دې مرکز څخه تر فراغت وروسته په ټولنه کې فعال او پر ځان بسیا شي.
د پروګرام ګډونوالو ځوانانو هم د اطلاعاتو او کلتور له ریاست او اکتید مؤسسې څخه مننه وکړه او له مسوولینو یې وغوښتل چې د ځوانانو د زده کړې او پیاوړتیا لپاره لا ډېره پاملرنه وکړي.
١٤٤٨/٣/٣٠ ه ق
