د پښتو او دري ژبو لیکلار د سمون او یوالي پنځه ورځنی علمي او فرهنګي ورکشاپ پیل شو

یکشنبه نېټه (۱۴۴۸ ربیع الاول ۹مه) د اطلاعاتو او فرهنګ وزارت د فرهنګ او هنر معینیت اړوند د ژبو عالي شورا کمېسیون له لوري د «پښتو او دري ژبو لیکلار د سمون او یوالي» په نوم د ژبو د علمي بنسټونو د پیاوړتیا، په لیکلارو کې د همغږۍ رامنځته کولو او د ادبي او فرهنګي معیارونو د لوړولو په موخه د ملي موزیم په تالار کې پنځه ورځنی علمي او فرهنګي ورکشاپ پیل شو.
په دغه ورکشاپ کې د اطلاعاتو او فرهنګ وزارت د فرهنګ او هنر معین شیخ عبدالرحمن طیبي، د یاد وزارت رئیسانو، د لوړو زده کړو وزارت، پوهنې وزارت، علومو اکاډمۍ، کابل پوهنتون، د ښوونې او روزنې پوهنتون استازو، استادانو، څېړونکو، ژبپوهانو، لیکوالانو، خبریالانو او د رسنیو استازو ګډون کړی و.
د ورکشاپ په پیل کې د خلکو د فرهنګ رئیس حافظ سیف الرحمن محمدي د دغه ورکشاپ د جوړېدو په اړه خبرې وکړې او ویې ویل: د ژبو عالي شورا کمېسیون د هېواد د ژبو لپاره د اړینو اسانتیاوو د برابرولو په موخه رامنځته شوی، ترڅو د هېواد د ملي او نورو ژبو لپاره یو شان لیکدودونه چمتو او ترتیب کړي.
وروسته د اطلاعاتو او فرهنګ وزارت د فرهنګ او هنر معین شیخ عبدالرحمن طیبي د ژبو د ارزښت او اهمیت په اړه معلومات وړاندې کړل او ویې ویل: د انسان غوره والی په ژبه او علم پورې تړاو لري. نوموړي زیاته کړه، چې د افغانستان اسلامي امارت د هېواد د ټولو ژبو د پیاوړتیا او پراختیا لپاره ژمن دی او په اسلامي نظام کې د ژبني، قومي، سمتي او مذهبي تعصب لپاره هېڅ ځای نشته.
د ښاغلي طیبي په وینا؛ د اسلامي نظام دښمنان تل هڅه کوي، چې د اختلافاتو په رامنځته کولو سره د هېواد خلک په بېلابېلو ډلو ووېشي؛ خو اسلامي امارت به د دا ډول اقداماتو ته اجازه ورنه کړي. نوموړي له ګډونوالو څخه وغوښتل، چې د هېواد د ژبو د پیاوړتیا او پراختیا په برخه کې پوره همکارۍ وکړي.
ورپسې د کابل پوهنتون د پښتو ژبې او ادبیاتو څانګې استاد پوهاند اجمل ښکلي، د دري ژبې او ادبیاتو څانګې استاد پوهاند روضت الله مجید، د پوهنې وزارت د تعلیمي نصاب رئیس مفتي محمد حلیم شاکر، استاد محمد معصوم هوتک او د افغانستان د علومو اکاډمۍ استازي د واحد لیکدود په اړه خبرې وکړې او ویې وویل: د پښتو او دري ژبو په لیکلارو کې ځینې توپیرونه شته او د دغه ورکشاپ موخه د همدې توپیرونو ارزونه او د دواړو ژبو لپاره د واحد او معیاري لیکدودونو چمتو کول دي، ترڅو په علمي، ښوونیزو، اداري او فرهنګي برخو کې په همغږې توګه ورڅخه استفاده وشي.

۱۴۰۵/۶/۱ هـ ش