هرات کې د سیاحتي خدمتونو د ظرفیت لوړونې لومړنی درې ورځنی سیمینار جوړ شو

د اطلاعاتو او فرهنګ وزارت د ګرځندوی، مالي او اداري معینیت اړوند د ټوریزم او هوټلدارۍ انسټېټیوټ له لوري د لومړي ځل لپاره په هرات کې د لوېدیځ زون د سیاحتي، زیارتي، حج او عمرې او روغتیایي شرکتونو د مسؤولینو لپاره د سیاحتي خدمتونو د ظرفیت لوړونې او پیاوړتیا په موخه درې ورځنی سیمینار جوړ شو.
د اطلاعاتو او فرهنګ وزارت د ټوریزم او هوټلدارۍ انسټېټیوټ آمر مولوي محمدزمان ناصري وویل: د دې سیمینار موخه د سیاحتي شرکتونو د مسؤلینو د ظرفیت لوړونه، مسلکي روزنه او لازمې لارښوونې وړاندې کول دي. نوموړي زیاته کړه، چې ډېری سیاحتي شرکتونه مسلکي کارکوونکي نه لري او د دې ډول روزنیزو پروګرامونو جوړول کولای شي، چې د دغې برخې د خدمتونو کیفیت لا ښه کړي. د نوموړي په وینا، د اسلامي امارت د واکمنۍ د لومړیو کلونو په پرتله اوس مهال د هېواد د ګرځندوی صنعت شاوخوا ۸۰ سلنه وده کړې او دا بهیر لا هم د پراختیا په حال کې دی.
ورته مهال، د هرات ولایت د سیاحتي، روغتیايي او زیارتي شرکتونو د اتحادیې رئیس حاجي محمد فاریابي د دغه سیمینار جوړېدل د لوېدیځ زون د سیاحتي فعالیتونو د ودې لپاره یو اغیزمن ګام وباله او د ورته روزنیزو پروګرامونو د دوام غوښتنه یې وکړه، ترڅو د سیاحتي شرکتونو ظرفیتونه لا پیاوړې شي.
همدارنګه، د بادغیس ولایت د اطلاعاتو او فرهنګ رئیس وویل: په دغه ولایت کې د ګرځندویانو لپاره لازمې اسانتیاوې برابرې شوې دي او په وروستیو کلونو کې ګڼ شمېر کورنیو او بهرنیو ګرځندویانو د بادغیس له طبیعي او تاریخي جاذبو څخه لیدنه کړې ده.
دغه راز د یو شمېر سیاحتي شرکتونو مسؤلینو د دې سیمینار له جوړېدو څخه هرکلی وکړ او ویې ویل: په هرات کې د ګرځندوی صنعت د ودې په حال کې دی او د لا پراختیا لپاره مناسبه زمینه برابره شوې ده. د یادو شرکتونو مسؤلینو له اړوندو امارتي مسؤولینو څخه وغوښتل چې د سیاحتي شرکتونو ملاتړ لاډېر کړي او په دې برخه کې لازمې اسانتیاوې رامنځته کړي، ترڅو هېواد ته د لا ډېرو بهرنیو ګرځندویانو د جذب زمینه برابره شي.

۱۴۴۸/۲/۱۲ هـ ق