د جنوب ختيځ زون خبريالانو ته روزنيز سيمينار پيل شو

د خوست اطلاعاتو او فرهنګ رياست او د خبريالانو د خونديتوب کميټې په ګډو همکاریو د جنوب ختیځ زون خبریالانو ته په حضوري او انلاین بڼه ۹ ورځنی روزنیز سیمینار پیل شو، چې دغه روزنیز سیمینار د خوست خبریالانو ته په حضوري او د لوګر، پکتیا او پکتیکا ولایتونو یو شمېر خبریالانو ته په انلاین بڼه وړاندې کېږي.
د خوست د اطلاعاتو او فرهنګ ریاست مسؤلینو وویل: ژورنالېزم د نوښت وړ مسلک دی او د دې ډول روزنيزو پروګرامونو جوړول د خبريالانو د ظرفيت لوړولو لپاره اړين دي، ترڅو وکولای شي د مسلک له نويو بدلونونو سره همغږي پاتې شي. مسؤلینو زياته کړه، د اطلاعاتو او فرهنګ ریاست هڅې کوي، چې د اړوندو ادارو په همکارۍ د خبريالانو لپاره ورته نور پروګرامونه هم برابر کړي.
په دغه سيمينار کې د شيخ زايد پوهنتون د ژورناليزم او عامه اړيکو پوهنځي دوه تنه استادان د ژورناليزم اړوند بېلابېل مسلکي موضوعات تدريسوي، چې د سيمينار په درسي پروګرام کې د ژورنالېزم بنسټيز اصول، راپور ليکنه، موبايل ژورنالېزم، سايبري خونديتوب او د ژورناليستانو فزيکي خوندیتوب موضوعات شامل دي.

۱۴۴۷/۱۱/۱۸ هـ ق