د لوحو او تبلیغاتي تابلوګانو د اصلاح کمېسيون مشورتي غونډه وشوه
سه شنبه (د۱۴۴۷ ذوالقعده الحرام ۱۱مه) د اطلاعاتو او فرهنګ وزارت د خپرونو چارو معين ښاغلي مهاجر فراهي په مشرۍ د لوحو او تبلیغاتي تابلوګانو د اصلاح کمېسيون مشورتي غونډه وشوه.
د ناستې په پیل کې، د ۱۴۰۵ لمریز کال لپاره د لوحو او تبلیغاتي تابلوګانو د اصلاح کمېسیون د بېلابېلو ادارو نوي استازي معرفي شول او د کمېسیون طرزالعمل ورته ووېشل او تشریح شو.
وروسته، د کمېسیون د ساحوي او مشورتي پروګرامونو د تنظیم او پراختیا په اړه بحث او د نظرونو تبادله وشوه.
همدارنګه د مشورتي او ساحوي پروګرامونو د لا بډاینې په موخه
د کمېسیون د نویو غړو وړاندیزونه واوریدل شول.
په پای کې، د بهرنیو اصطلاحاتو او کلمو د بدیل یاداښت نوټ د اطلاعات او فرهنګ وزارت په رسمي لوګو او د لوحو او تبلیغاتي تابلوګانو د اصلاح کمېسیون په مهر باندې د بحث لاندې ونیول شو، چې یاد یاداښت نوټ د اصنافو او هټۍ لروونکو لپاره د بهرنیو اصطلاحاتو او کلمو د بدیلو وړاندې کولو په موخه د هېواد په ملي ژبو باندې طرحه شوی دی.
۱۴۰۵/۲/۸ هـ ل
