له وړیا ښوونیز مرکز څخه لسګونه ځوانان فارغ شول
د ننګرهار اطلاعاتو او کلتور ریاست له وړیا ښوونیز مرکز څخه په پنځمې دورې کې د ویناوالۍ له ټولګیو څخه ۶۵ تنه ځوانان فارغ شول.
د یاد ریاست مسؤلینو وویل: ځوانان که په ښه توګه دیني او عصري زده کړې ترلاسه کړي، د هېواد راتلونکی به روښانه او پرمختللی وي، دوی باید د ویناوالۍ له مهارت څخه د ټولنې د اصلاح، عامه پوهاوي او ملي یووالي د پیاوړتیا لپاره ګټه واخلي او ځوانانو ته یې سپارښتنه وکړه، چې خپلې زده کړو ته لا نور هم دوام ورکړي.
د مسؤلینو په وینا؛ د اطلاعاتو او کلتور ریاست به په راتلونکې کې هم د ځوانانو د ظرفیت لوړولو لپاره ورته روزنیزو پروګرامونو جوړول دوامداره وساتي.
د یادونې وړ ده، چې د فراغت غونډې په پای کې د اطلاعاتو کلتور ریاست له لوري د هنري او فرهنګي خدماتو د ستاینې په موخه د جلال اباد ښار یو شمېر خطاطانو ته هم ستاینلیکونه ورکړل شول، مسؤلینو د خطاطۍ هنر د اسلامي او ملي فرهنګ مهمه برخه وبلله او ویې ویل: د دغه هنر د ودې او ملاتړ لپاره به لا نورې هڅې هم ترسره شي.
۱۴۴۷/۹/۵ هـ ق
