ګرځندویانو لپاره د خدماتو په څرنګوالي، د ګرځندویانو د امنیت او ویزو کې د اسانتیاوو رامنځته کولو په موخه ناسته وشوه
د اطلاعاتو او کلتور وزارت د ګرځندوی، مالي او ادراي چارو معین مولوي قدرت الله جمال په مشرۍ د ګرځندوی اړوندو ادارو له مسؤلینو سره ناسته وشوه.
په دغه ناسته کې د ګرځندویانو لپاره د خدماتو په څرنګوالي، د ګرځندویانو د امنیت او د ویزو په برخو کې د اسانتیاوو رامنځته کولو او حج او عمرې ته د تلونکو لپاره د لا ښو شرایطو د برابرولو په اړه خبرې وشوې، ترڅو د ټولو اړوند ادارو په پوره همغږۍ کورنیو او بهرنیو ګرځندویانو ته په ټولو برخو کې لازمې اسانتیاوې رامنځته شي.
د ګرځندوی، مالي او اداري چارو معین مولوي قدرت الله جمال د ګرځندوی سکتور په برخه په دوامداره همغږۍ ټینګار وکړ او ویې ویل: د ګرځندوی سکتور پیاوړتیا د هېواد د اقتصاد په وده کې اغیزمن رول لري، چې د اړوندو ادارو په پوره همغږۍ سره دغه سکتور په ښه توګه وده کولای شي.
ښاغلي جمال زیاته کړه؛ د اطلاعاتو او کلتور وزارت د سیاحتي شرکتونو د لا معیاري کولو او ګرځندویانو ته د لا غوره خدماتو وړاندې کولو په برخو کې پوره هڅې کوي.
ورته مهال د بېلابېلو ادارو مسؤلینو د ګرځندوی سکتور په برخه کې د پوره همکاریو ډاډ څرګند کړ او د دې سکتور پیاوړتیا یې د ټولو ګډ مسؤلیت وبلله.
۱۴۴۷/۸/۷ هـ ق
