د شرعي نظام په استحکام کې د اطاعت د اغېزو په نوم د کتاب لوستنې سیالۍ پایلې اعلان شوې
د فاریاب ولایت د اطلاعاتو او کلتور ریاست له لوري د امنیه قوماندانۍ په همکاریو د ۱۱۵ تنو مجاهدینو ترمنځ د شرعي نظام په استحکام کې د اطاعت د اغېزو په نامه د کتاب لوستنې سیالۍ چې څه موده وړاندې ترسره شوې وه، پایلې یې اعلان او ۱۰ تنه مخکښ ګډونوال یې په بېلابېلو ډالیو وستایل شول.
د فاریاب ولایت د اطلاعاتو او کلتور رئیس مولوي شمس الدین محمدي وویل: د اسلامي نظام په استحکام او ثبات کې د امیراطاعت یو اساسي رکن دی او د دې سیالۍ له ترسره کولو څخه موخه د مجاهدینو دیني پوهې پیاوړتیا، د مطالعې دود عام کول او د مجاهدینو ترمنځ د مسؤلانه او باخبره اطاعت دود عام کول دي.
دغه راز د فاریاب ولایت د امنیه قوماندانۍ د مطبوعاتو آمر د دغې سیالۍ د جوړونکو څخه د مننې ترڅنګ د امنیتي ځواکونو ترمنځ د امراوو څخه د اطاعت روحيې پیاوړتیا په موخه د ورته پروګرامونو جوړولو په اهمیت ټینګار وکړ.
۱۴۴۷/۶/۲۹ هـ ق
