د اسلامي نظام په استحکام کې د اطاعت اغیزو په نامه د کتاب لوستنې سیالۍ پایلې اعلان شوې

د سرپل ولایت د اطلاعاتو او کلتور ریاست له لوري د البرز علمي او فرهنګي ادارې په همکارۍ د اسلامي نظام په استحکام کې د اطاعت اغیزو په نامه د کتاب لوستنې سیالۍ چې څه موده وړاندې د دې ولایت شپږ سوو تنو امنیتي منسوبینو ترمنځ ترسره شوې وه، پایلې یې اعلان او مخکښ ګډونوال یې وستایل شول.
د اطلاعاتو او کلتور ریاست اړوند د ځوانانو چارو آمر د عالیقدر امیرالمومنین حفظه الله ۱۷ مې ګڼې فرمان (چې د ناوړه دودونو د مخنیوي په موخه صادر شوی) ولوسته او په ټولنه کې یې د یاد فرمان د پلي کیدو په موخه د اړوندو ادارو او خلکو په همکاریو ټینګار وکړ.
د اطلاعاتو او کلتور رئیس ملا عبدالغفار حقنما د تېرو دو لسیزو په لړ کې د مجاهدینو هڅو ته په اشارې سره وویل: د دندې اصولو ته ژمنتیا، پاک نیت، د امیراطاعت او د ټولنې له ټولو قشرونو سره ښه چلند د مجاهدینو د بریا ستر عوامل و او دا کولای شي، چې په راتلونکي کې هم د نظام د لا پیاوړتیا او ثبات سبب شي.
ښاغلي حقنما د پروګرام له ګډونوالو څخه وغوښتل، چې په خپل چلند او د مسؤلیتونو د ترسره کولو پر مهال اصول او قوانین په پوره توګه مراعت کړي او له خلکو سره متوازنې او سالمې اړیکې ولري.
د یادې سیالۍ ګډونوالو د مسؤلینو څخه د مننې ترڅنګ په راتلونکي کې د ورته نورو ښوونیزو او فرهنګي پروګرامونو جوړولو غوښتنه وکړه او دغه پروګرامونه یې د ظرفیت لوړونې او امنیتي منسوبینو په عامه پوهاوي کې مهم او اغیزمن یاد کړ.
د یادونې وړ ده، چې د یادې سیالۍ مخکښ ګډونوال په بېلابېلو معنوي او مادي ډالیو سره وستایل شول.

۱۴۴۷/۶/۲۲ هـ ق