هلمند کې د فکري روزنې سیالۍ مخکښ ګډونوال وستایل شول

د هلمند ولایت د اطلاعاتو او کلتور ریاست له لوري، د الرباط فکري او فرهنګي ادارې، هلمند پوهنتون او پوهني ریاست په ګډو همکارو د هلمند پوهنتون په تالار کې د فکري روزنې سیالۍ مخکښ ګډونوال وستایل شول.
د اطلاعاتو او کلتور ریاست استازي د اسلامي فکر پیاوړتیا د ټولنې د ستونزو د حل او د هېواد د معنوي پراختیا مهمه وسیله وبلله او تیر شل کلن اشغال ته په اشارې یې وویل: لکه څنګه چې د اشغالګرو سره جهادي مبارزه فرض وه، نن بیا د همدې نظام ساتنه او دفاع فرض ده. 
همدا راز نورو ویناوالو د دې ډول فکري او علمي پروګرامونو جوړول د اسلامي فکر د پراختیا او د اسلامي عقیدې د ټینګښت لپاره اړین وبلل او زیاته یې کړه؛ چې مسلمانان باید د کلتوري یرغلونو پر وړاندې خپل فکري هویت وساتي او د اسلامي اصولو په رعایت او تطبیق سره د پرمختګ لاره خپله کړي.
ویناوالو وویل: ټول هغه ځوانان چې د علم په ترلاسه کولو بوخت دي، د هېواد د راتلونکي معماران دي، دوی له ځوانانو څخه وغوښتل، چې د خپلو زده ‌کړو ترڅنګ د اسلامي فکر او سالم ذهن روزني ته هم جدي پاملرنه وکړي.
د غونډې په لړ کې د فکري روزنې سیالۍ ۲۰ تنه مخکښ ګډونوال په بېلابېلو معنوي او مادي ډالیو وستایل شول.

۱۴۴۷/۵/۱۷ هـ ق