د اطلاعاتو او کلتور رئیس له هنري روزنیزو مرکزونو څخه څارنه وکړه
د بامیان ولایت د اطلاعاتو او کلتور رئیس قاري سید مصطفی صالح د یو پلاوي په مشرۍ د نقاشۍ، خطاطۍ او میناتورۍ له یو شمېر هنري روزنیزو مرکزونو څخه لیدنه وکړه.
ښاغلي صالح له دې لیدنې څخه موخه د هنرمندانو هنري ظرفیت لوړونه، ستونزې اورېدل او په هنري او فرهنګي برخه کې د دوی هڅونه یاده کړه.
نوموړي وویل: هنر د انسان د ژوند په بېلابېلو برخو کې اغیزې او ارزښت لري، د بیلګې په توګه؛ نقاشي، خطاطي، او نور هنري کارونه د اړیکو په ټینګولو او آینده نسلونو ته د فرهنګ په انتقالولو کې مهم رول لري.
ښاغلي صالح زیاته کړه؛ هنرمندان د خپلو آثارو په واسطه د انسانانو د یوې تاریخي دورې ارزښتونه، احساسات، باورنه، ستونزې او د هویت انځور څرګندوي.
په ورته وخت کې د نقاشانو په استازولۍ یو تن نقاش سید رضا موسوي د اطلاعاتو او کلتور رئیس لیدنه د هنر فرهنګ په پیاوړتیا او هنرمندانو ته د انګیزي ورکولو په برخه کې مهم او اغیزمن ګام یاد کړ.
۴/۲/۱۴۴۷ هـ ق
