پنجشېر کې (له کتاب سره سفر) تر سرلیک لاندې فرهنګي پروګرام جوړ شو
د پنجشېر ولایت د اطلاعاتو او کلتور ریاست له لوري (له کتاب سره سفر) تر سرلیک لاندې فرهنګي پروګرام د دې ریاست اړوند عامه کتابتون کې د لسګونو ځوانانو په شتون کې جوړ شو.
د اطلاعاتو او کلتور رئیس مولوي نصرالله ملک زاده د دې پروګرام تر سره کولو څخه موخه د مطالعې لور ته د ځوان نسل هڅول، د مطالعې دود غښتلی کول او د کتاب او مطالعې په واسطه ځوانانو ته لارښوونه کول یاد کړه.
ښاغلي ملکزاده وویل: د ځوانانو په پیاوړتیا کې مطالعه، فکري ودې ته زمینه برابرول او ټولنیز پوهاوی مهم رول لوبوي.
د یاد فرهنګي پروګرام ګډون کوونکو ځوانانو د پروګرام جوړولو له امله د اطلاعاتو او کلتور رياست څخه مننه وکړه او د ولسوالیو په کچه يې د ورته نورو پروګرامونو جوړولو غوښتنه وکړه.
۱۴۴۶/۱۲/۲۹ هـ ق
