په هرات کې د شيخ ابو الوليد آزاداني تاريخي آرامګاه او جومات تر مرمت لاندې دي
د شيخ ابو الوليد آزاداني د آرامګاه او جومات د مرمت کار په راتلونکو اوونيو کې بشپړېږي.
د شيخ ابو الوليد آزادني (رح) د آرامګاه او جومات د ايوان يوه برخه چې د تېرکال په ژمي د باران په اورښتونو کې زيانمنه شوې وه، په وروستيو مياشتو کې د هرات د اطلاعاتو او فرهنګ رياست تر مرمت او بيارغاونې لاندې ده.
د هرات د اطلاعاتو او فرهنګ رييس آريا رووفيان باختر آژانس ته وويل چې دغه تاريخي څلى د ابو الوليد زيارت د متوليت د مالي ملاتړ او د هرات د تاريخي آبداتو د ساتنې او ترميم آمريت تر مستقيمې څارنې لاندې د ترميم په حال کې دی.
د هرات د اطلاعاتو او فرهنګ رياست دوه کاله مخکې هم د دغه تاريخي څلي د ساتنې او څارنې لپاره لومړني ترميمات ترسره کړي وو.
د دغه مهم تاريخي څلى چې زيات لرغونتيا لري، د بنسټ ډبره د آلکرت په وخت کې اېښودل شوې وه او د تيموريانو په دوره کې هم په اساسي ډول ترميم شوی و.
د تيموريانو له دورې وروسته تر وروستيو کلونو پورې دغه څلي ته کومه پاملرنه نه ده شوې، خو په وروستيو مياشتو کې د هرات د اطلاعاتو او فرهنګ رياست د نورو ستر پروګرامونو په لړ کې دغه تاريخي څلي تر ترميم لاندې نيولی دى چې کار به يې په راتلونکو اوونيو کې بشپړ شي.
کابل / د ليندۍ ٩ مه / باختر
