د برګټ عبدالاحمد خان کلا له سلو کلو اوږده مخينه لري

د غزني د اطلاعاتو او کلتور رئیس ملا حمید الله نثار د برګټ تاریخي کلا څخه د څارنې په موخه لیدنه وکړه.
ښاغلي نثار د دغې تاریخي کلا په ساتنه تینګار وکړ او ويې ویل: د برګت عبدالاحمد خان کلا چې عام وګړي یې د برګټ د کلا په نوم پیژني، تر سلو کلونو زیاته مخینه لري.
 نوموړي د ځایي مورخینو له قوله زیاته کړه، چې د دغې ودانۍ د بنسټ ډبره امیر حبیب الله خان ایښې، چې اته ضلعې او اته برجونه لري، د ښاغلي نثار په خبره د دغې کلا د ننه یوه بله کلا هم د حرم سرای په ډول جوړه شوې، چې د څلورو برجونو درلودونکې ده.
نوموړي وویل: له دغې تاریخي کلا څخه د تیرو نظامونو پر مهال د پوځي مرکز په توګه استفاده شوې او د ساتنې لپاره یې هیڅ ډول تدابیر نه وو نیول شوي، چې له دې امله یې ځینې برخې نړېدلي او نورې برخې یې د نړېدلو له ګواښ سره مخ دي.
 ښاغلي نثار ژمنه وکړه، چې د دغې تاریخي کلا د ساتنې او بیا رغونې په برخه کې به خپلې هڅې نه سپموي.
 یاده تاریخي کلا د کابل-  کندهار د عمومي لارې ختیځ لور ته د غزني- پکتیکا سرک سره خوا کې موقعیت لري، چې د غزني ولایت د تاریخي کلاګانو په ډله کې راځي.

۱۰/۱۰/۱۴۴۶ ق