سرپل کې د رسنيو له مسؤلينو او خبريالانو سره د همږغۍ ناسته وشوه
سرپل ولايت کې د اطلاعاتو او کلتور رياست له لوري د مرستیال والي ملا خال محمد حقاني په مشرۍ د اطلاعاتو او کلتور د رئیس، خبریالانو او د رسنیو د مسؤلینو په حضور کې د همږغۍ ناسته وشوه.
ملا خال محمد حقاني د رسنيزو فعالیتونو پر ارزښت ټینګار وکړ او ویې ویل: رسنۍ د واقعیتونو د انعکاس او عامه پوهاوي په برخه کې مهم رول لري، باید د خپلو فعالیتونو پر مهال لازمه همږغي او همکاري ولري، نوموړي له خبریالانو وغوښتل، چې د اسلامي امارت د پالیسۍ په رڼا کې خپل فعالیتونه ترسره کړي او د عامه پوهاوي په برخه کې هڅې وکړي.
د اطلاعاتو او کلتور رئیس ملا عبدالغفار حقنما د رسنيو د مسؤلینو او خبريالانو د ملاتړ یادونه وکړه او ویې ویل: اداره یې تل د خبریالانو ملاتړ ته ژمنه ده او خپلې همکارۍ ته به دوام ورکړي.
په دې ناسته کې خبریالانو خپلې ستونزې او ننګونې له مسؤلینو سره شریکې کړې او د حل غوښتنه یې وکړه.
د ناستې په پای کې د سرپل ولایت مقام مرستیال ډاډ ورکړ، چې سیمه ییزه اداره به د خبریالانو او رسنیو د ملاتړ او د ستونزو د حل په برخه کې هر اړخیزه همکاري وکړي.
۱۴۴۶/۹/۱۸ ق
۱۴۰۳/۱۲/۲۸ ل
