هرات کې د ( ټولنیزو رسنیو اغېز د ځوانانو پر ژوند باندې) تر عنوان لاندې سمینار جوړ شو

د هرات د اطلاعاتو او کلتور ریاست د ځوانانو چارو آمریت د (ټولنیزو رسنیو اغېز د ځوانانو پر ژوند باندې) تر عنوان لاندې سمینار د نهاوند علمي او کلتوري ادارې په همکارۍ انجیل ولسوالۍ کې جوړ شو.  
د هرات د اطلاعاتو او کلتور رئیس مولوي احمدالله متقي په دې سیمینار کې وویل "ځینې افراد او ډلې د ټولنیزو رسنیو څخه د دیني باورونو کمزوري کولو، غلطو افکارو خپرولو او ځوانانو د انحراف لپاره استفاده کوي، نو په دې برخه کې اړتیا شته چې زیات پوهاوی ورکړل شي."  
د هرات د اطلاعاتو او کلتور رئیس له ځوانانو وغوښتل چې د ټولنیزو رسنیو په کارولو کې احتیاط وکړي او له دې څخه د علمي، کلتوري او ټولنیزو پرمختګونو لپاره ګټه واخلي.  
د هرات د اطلاعاتو او کلتور د ځوانانو چارو آمر مولوي عبدالمتین عادل وویل "په دې سیمینار کې له ۳۰۰ څخه زیات ځوانانو ګډون وکړ او د ټولنیزو رسنیو د مثبتو او منفي اغېزو په اړه مهم مطالب د ځوانانو آمریت له لوري وړاندې شول. " 
دا سیمینارونه په داسې وخت کې ترسره کېږي چې په هرات کې د ټولنیزو رسنیو کارول د ځوانانو په منځ کې په بې ساري توګه زیات شوي دي، چې په دې اړه د مثبتو او منفي اغېزو د څیړلو په موخه سمینار ورته دائر شو.

۱۴۴۶/۸/۱۴ هـ ق
۱۴۰۳/۱۱/۲۵ هـ ل