د نشراتو معين د پروان ولايت د اطلاعاتو او فرهنګ رياست او تاريخي آبدو څخه ليدنه وکړه
دو شنبه (۲۵ ذوالقعده ۱۴۴۵ ) د اطلاعاتو او فرهنګ وزارت د نشراتو معین مولوي حيات الله مهاجر فراهي پروان ته د خپل سفر په ترڅ کې د اطلاعاتو او فرهنګ ریاست د کارکوونکو سره د هغوی د ستونزو او وړاندیزونو اورېدلو په موخه وکتل او د توپدرې له سټوپېڅخه يې ليدنه وکړه
د پروان ولایت د اطلاعاتو او فرهنګ رئیس مولوي شمس الرحمن صدیقي له نشراتي معين سره د کارکوونکو د پيژندنې ترڅنګ د شته لاسته راوړنو او پلانونو په اړه معلومات ورکړل.
مولوي حيات الله مهاجر فراهي په خپلو خبرو کې وویل: اطلاعات او فرهنګ له معنوي اړخه خورا مهمه څانګه ده او د ټولنې ټول معنوي اړخونه سره رانغاړي، که غواړو یوه بريالۍ اداره ولرو، باید یو بل سره ورورولي، صمیمیت او همغږي ولرو او د یو او بل سره د ستونزو په حل کې ګډ ګامونه واخلو او له کارکوونکو څخه یې وغوښتل، ترڅو د اسلامي اصولو په رڼا کې کار وکړي او تعصب څخه ځان وساتي.
دغونډې په ترڅ کې د یاد ریاست اړوند شته ستونزې معین صاحب سره شریکې شوې، چې نوموړي د یادو ستونزو حل په موخه پوره ډاډ ورکړ او زیاته یې کړه چې پوره هڅه کوي ترڅو شته ستونزې حل شي.
همدا راز د نشراتو معين مولوي حیات الله مهاجر فراهي د پروان ولايت د توپدرې له سټوپې څخه ليدنه وکړه او ويې ويل: اسلامي امارت لرغونو سيمو او تاريخي ودانيو ته ځانګړې پاملرنه کړې ده، لرغونې او سیاحتي سيمې د افغانستان د تمدن استازیتوب کوي او د کورنیو او بهرنیو سیلانیانو د پام او پراخ حضور په جلبولو سره د هېواد د اقتصادي ودې لامل ګرځي.
۱۴۰۳/۳/۱۴ ھ ش
۲۰۲۴/۶/۳ ميلادي
