کاپیسا کې د (ګل زرد/ژړ ګل) په نوم لویه مشاعره ترسره شوه
پنج شنبه( ۳۰ د شوال المکرم ۱۴۴۵) د کاپیسا ولایت په مرکز کې د اطلاعاتو او فرهنګ رياست له لوري د ګل زرد په نوم لویه مشاعره ترسره شوه.
یاده مشاعره کې د اطلاعاتو او فرهنګ وزارت سرپرست محترم ملا خيرالله خیرخواه، د هنر او کلتور معین مولوي عتیق الله عزیزي، د خپرونو چارو سرپرست معین مولوي ضیاء الحق حقمل، د کاپیسا والي قاري احسان الله بریال، ګڼ شمېر نورو مسؤلینو، د بېلابېلو ولایتونو څخه راغلو شاعرانو، لیکوالانو، متنفذینو او ځوانانو ګډون کړی وو.
د اطلاعاتو او فرهنګ وزير ښاغلي ملا خيرالله خیرخواه وويل: هغه څه باید په ژبه ټولنې ته وړاندې کړو چې خیر رسوونکي وي،
ښاغلي خيرخواه زیاته کړه اوس ددې وخت رارسېدلی چې ټول په يوه غږ د اسلامي نظام د لا پياوړتيا، د هېواد د پرمختګ، د افغانانو ترمنځ د ملي يووالي او د هېوادوالو د لا هوساينې لپاره کار وکړو او د نظام او هېواد د دښمنانو په پوچو تبليغاتو ونه غولېږو.
د اطلاعاتو او فرهنګ وزارت د فرهنګ او هنر معين مولوي عتیق الله عزيزي وویل: مشاعرې د روزنې يو ښه بستر دی او شاعران او ليکوالان بايد په خپلو شعرونو او ليکنو کې د اسلامي نظام د استحکام، د افغانانو ترمنځ د ملي يووالي، د ملت او حکومت د نږدېوالي، د هېواد د آبادۍ او پرمختګ موضوعاتو ته ډېره پاملرنه وکړي.
همدا ډول شاعرانو خپل شعرونه د مشاعرې ګډونوالو ته واورول، چې د ګډونوالو له لوري په تودو ولولو او احساساتو بدرګه شول.
مشاعره د کاپیسا د والي مېلمنو ته د ښه راغلاست ویلو ترڅنګ په اختتامیه دعا پای ته ورسېده.
۱۴۰۳/۲/۲۰ ھ ل
۲۰۲۴/۵/۹ ميلادي
