د بغلان د دهنه غوري ولسوالۍ له سیاحتي سیمو څخه لیدنه ترسره شوه
دوشنبه ( ۱۳ د شوال المکرم ۱۴۴۵) د بغلان ولايت د اطلاعاتو او کلتور ریاست مسؤلینو د دې ولایت د دهنه غوري ولسوالۍ په سیاحتي سیمو کې له کورنیو سیلانیانو سره د لیدنې په موخه دغې ولسوالۍ ته سفر وکړ او هلته یې سیلانیانو ته د اسانتیاوو د برابرولو ژمنې وکړې.
د بغلان د اطلاعاتو او کلتور ریاست د کلتور او ګرځندوی آمر مولوي عزت میرحقاني د دهنه غوري ولسوالۍ د بیلابیلو سیاحتي سیمو څخه د لیدنې پر مهال وویل: اوس په ورځني ډول لسګونه سیلانیان د دې ولسوالۍ له طبعي مناظرو او ښکلاوو څخه د لیدنې په موخه سیاحتي سیمو ته راځي، د اطلاعاتو او کلتور ریاست به هڅه وکړي چې په بیلابیلو برخو کې سیلانیانو ته اسانتیاوې رامنځ ته کړي.
حقاني زیاته کړه؛ په سږني پسرلي کې د سیلانیانو ګڼه ګوڼه د دهنه غوري په سرسبزه سیاحتي سیمو کې د نورو کلونو په پرتله زیاته لیدل کیږي او غوښتنه یې وکړه چې نور سیلانیان هم باید د دې ولسوالۍ د طبعي مناظرو د لیدو په موخه دهنه غوري ته سفرونه وکړي.
د تیر نظام پرمهال د دهنه غوري ولسوال محمد قسیم اندړ چې د دهنه غوري سیاحتي سیمو ته له سیلانیانو سره یوځای راغلی وايي، چې اوس د پخوا په پرتله په ټول هیواد کې آمنیت ډاډمن شوی او خلک په خورا اسانۍ سره کولای شي چې له یوې سیمې بلې سیمې ته سفرونه وکړي او خپلې میلې او سياحت ترسره کړي.
