د افغانستان لپاره د UNHCR استازي د ځوانانو چارو له معين سره وليدل
پنجشنبه ( ۱۹ د شعبان ۱۴۴۵) د اطلاعاتو او کلتور وزارت د ځوانانو چارو معين قاري محمد يونس راشد د خپل کار په دفتر کي د افغانستان لپاره د ملګرو ملتونو د مهاجرينو عالي کمیشنرۍ له استازي ليونارډ زولو سره وکتل.
په کتنه کي د هغو مهاجرو افغان ځوانانو د ستونزو په اړه خبرې وشوې، چي په وروستيو کي له پاکستان او ايران هيوادونو څخه له خپلو کورنیو سره په زور را ايستل شوي دي.
همدا راز نويو راستنو شويو ځوانانو ته د عامه پوهاوي او کاري فرصتونو د رامنځته کولو په برخو کي د ځوانانو چارو معینیت د طرحو او پلانونو په اړه خبري وشوې چي د ښاغلي زولو لخوا د ځوانانو چارو معینیت د فريلانسينګ پروګرام ډېر ګټور وبلل شو.
د UNHCR په استازيتوب ښاغلي زولو د ځوانانو چارو معین ښاغلي راشد ته ډاډ ورکړ چي د فريلانسينګ پروګرام په تطبيق کي به بشپړه همکاري وکړي، څو ځوانانو ته په انلاين توګه ګڼ نړيوال کاري فرصتونه برابر شي.
د غونډي په پای کي پرېکړه وشوه چي دواړه ادارې به ډېر ژر تخنيکي ټيمونه ټاکي تر څو د فريلانسينګ پروګرام د تطبيق لپاره عملي کړنلاره چمتو کړي.
