د ګردېز بالاحصار به کلتوري، تاريخي او سياحتي ځای وګرځي
د کور او ښار جوړولو وزارت څخه د ګردېز تاريخي بالاحصار د بيا جوړولو او رغونې پۀ موخه د راغلي هيئت ګډونوالو د پکتيا لۀ مرستيال والي الحاج شيخ انعام الله "صلاح الدين" سره پۀ ليدنه کې وويل: د ګرديز تاريخي بالاحصار به د هېواد په کچه کلتوري، تاريخي او سياحتي ځای وګرځي.
ياد تخنيکي هيئت چې پکتيا ولايت کې د ګرديز تاريخي بالاحصار د بيا جوړولو او رغونې د سروې پۀ موخه راغلی و، د پکتيا له مرستيال والي سره يې د خپلو کړنو د شريکولو په موخه ناسته تر سره کړه او د يادې سروې د بشپړاوي لپاره يې د ولايت مقام او اړونده ادارو همکاري اړينه ياده کړه.
مرستیال والي الحاج شيخ انعام الله "صلاح الدين" راغلي هيئت ته هرکلی ووايه، له خپله اړخه يې د هر اړخيزو همکاريو ډاډ ورکړ او زياته يې کړه، پکتيا ولايت ډېر تاريخي ځايونه او ابدات لري، چې پاملرنه ورته وشي د هيواد په کچه به مهم تاريخي او کلتوري ځايونه وي، مرستيال والي خوښي څرګنده کړه، چې د دغه ډول ځايونو بيا جوړولو او رغونې ته رسېدنه او پاملرنه کېږي.
۱۴۴۵/۸/۱ هـ ق
۱۴۰۲/۱۱/۲۲ هـ ل
