لغمان کې د ولایتي ادارې او د رسنیو د مسؤلینو ترمنځ د همغږۍ ناسته تر سره شوه
تېره ورځ د لغمان ولايت د اطلاعاتو او کلتور رياست په هڅو په ولايت مقام کې د دولتي ادارو او د رسنيو د استازو ترمنځ د همغږۍ ناسته ترسره شوه.
د اطلاعاتو او کلتور رياست د اطلاعاتو آمر عتیق الله قریشي وويل: په لغمان کې رسنۍ په ښه وضعیت کې دي، د رسنیزو فعالیتونو لپاره ورته ښه چاپیریال برابر شوی، د راپور ورکولو په برخه کې ورته سهولتونه رامنځته شوي، دوی کولای شي، په ډاډه زړه خپل رسنیز فعاليتونه ترسره کړي، تر دې دمه د ژورنالېستانو پر وړاندې کومه ستونزه نشته، چې د اندیښنې وړ وي ټول خبریالان د ا.ا.ا. د پالسیو له مخې خپلې رسنيزې چارې ترسره کوي.
د لغمان د والي ویاند د رسنيو مسٶلينو ته وويل: د ولایت مقام د رسنيو او اړيکو دفتر شپه او ورځ د رسنیو د مسؤلینو پوښتنو او غوښتنو ته ځواب ویلی او هڅه يې کړې، چې دوی ته پر وخت کره او دقیق معلومات ورکړي.
نوموړي د ټولو رسنيو له خبریالانو وغوښتل، چې د هېواد ابادۍ، پرمختګ او انکشافي پروژو اړوند راپورونه برابر کړي او د خپلو رسنیو له لارې يې د ولس تر غوږونو ورسوي.
۱۴۴۵/۶/۲۰ هـ ق
۱۴۰۲/۱۰/۱۲ هـ ش
