د کونړ جهادي او کلتوري ارزښتونه دیوې مشاعري په ترڅ کې وستایل شول
تېره ورځ د اطلاعاتو کلتور وزارت د کلتور او هنر معين عتیق الله عزیزي د کونړ د اطلاعات کلتور ریاست او ملي راډیو تلویزون له لوري د کونړ د جهادي او کلتوري ارزښتونو د ستایلو په ویاړ جوړه شوې مشاعره کې برخه واخیسته.
په یاده مشاعره کې چې د کونړ یوزیات شمیر شاعرانو لیکوالو، مخورو ،امارتي چارواکو او ځوانانو برخه درلوده، د اطلاعاتو کلتور وزارت د کلتور او هنر معین پرانېستونکې هراړخیزه وینا وکړه، په ټولنه کې یې د شعر ارزښت او د شاعر مکلفیت بیان کړ او زياته يې کړه؛ مونږ د جنګ له مرحلې تېر شوي یو، اوس ددې وخت رارسیدلی چې د هیواد د بیا رغونې او استحکام لپاره د شعر، ترنم او قلم په قوت کار وکړو، حقایق ښکاره کړو، رغنده پیغام وړاندې کړو او هم مسؤلین په خوږه ژبه خپلو نیمګړتیاوو ته ځیرکړو.
دمشاعرې په لړ کې د بېلابېلو شاعرانو له لوري خواږه ، حماسي ،طنزیه او اصلاحي شعرونه وويل شول اود کونړ د کلتوري اوجهادي ارزښتونو او ښایستونو په باب خوندورې زمزمې وړاندې شوې.
۱۴۴۵/۶/۱۴ هـ ق
۱۴۰۲/۱۰/۶ هـ ش
